KIR ZAI A REL SI LO MAW

R Lalchanchinmawia Kll
26 August at 11:53
KIR ZAI A REL SI LO MAW
1
Hmanah duhtin sama hlimten laitual lêngin,
Nau ang ka lawm thin hlimna êngzam kai chiai;
Chutin, eng dawn lote'n laitual ka lêng thin kha,
Tunah erawh a thui ta e beidawnna khua rèng.
Hmatiang lawmna vul tur thlir chung hian e,
Dawntuai lêng leh partin an lo vul leh a;
Vul leh zai rel ve maw e kan nunhluite'n?...
Khawnge hlimte'n kan lenlaini zawng kha,
A chang zo ta si e saisen nau ang ka tahna.
II
Hmanah chawbân vuana hlim nui hiauvin,
Zalam phei zawhin kan hrût lai kan lênna tual;
Hmuntinah a thangkhawk e kan hlim nui ri,
Tunah erawh lûmtu awm lo sumtual a ngui riai.
Aw, ka han thlir changin i sulhnu zawngte,
Lenthla mawi aiang zialtu i sakruang mawi;
Rial ang ral lo mahse chhingmit hlimthlaah...
Kawlah a herliam ta maw lawm laini zawngte,
Nau ang ka tap tlangrel rèng ka dawn zo lo.
III
Ka han dawn chang hian khachen sul ang zui a,
Hlimten hlimlai par kan tlan dun lai zawng kha;
Ti maia chul tur hian aw, ka phal mawlh si lo,
Der thiam mi u, aw.. ka ngai em che.
Mahse, min chhang si lo maw tapin au mah i,
Mahte'n tinkim dâwnin tlei zai rèng ka rel si lo;
Nghilh rualloh i ânkanêm bengah thangkhawkin...
Ngaiin ka au ruai thin che a sin nghilhloh mi u,
Engah hnutiang chhawna min hersan mai le.