HNAM PASALȚHA

Emmanuel Lalrindika Jahau

5 September at 09:25

HNAM PASALȚHA {teachers' day pual}
(epic/epos)

Hmatiang sawna rualban tum rùal,
Ze hrang, duh hrang, ngainat hrang țhiau, 
Thiam rûn belin hmakhua kan sual,
Kan ni, thiamthang puakchhuah tum siau.
Zirtu awm tikin zirtirtu,
Awm na ngai e thiamthang hlantu.

Hnam damna, hnam pasalțha chu,
Hnâmchem lova hnehna neihna
Thiamthang min hlantute ngei chu,
Zirtu thliar sawmna leh hleihna
Bàn vêk, țhuang khata hrût rualtu,
Zirtirtu țha leh ropui chu.

Zir kawng lambà hlìmna finna,
Fàh hmanhlelin a phili buai,
Zan dài reh thleng zir tur duanga
Buaiin, zirtu kawltu a buat.
Rimtawng tawngkhawngte'n pel bik suh,
A zirtu hlawhtlin chauh a duh.

Silh loh thuam mawi min bàn bang lo,
Bilhpuan sawichhinga țan lak chu
Zirlai kutah innghat fai zo,
Hriat țhelh âtna thlah lòh zír chu,
Fin thuam bela pàr chhúang turin
Min chawm lian a hriat belh turin.

Âtna bual khah hnàwn huh hluam kha,
Finna puana hruk ro tumin,
Mahni nawnsak bosal țhin kha,
Tu-khaw hriat hlawh hlei lo mênin,
A hmanhlel buai, țul, chau fawmkem,
A thiamna rah fung mawi min sem.

Hnam tân, ram tân, țhàn sàn zel na'n
Tharüm, hnamchem, laifei tel lo,
Hnehna hlado kan chham theih na'n,
Kûlpui, ngulpui chu bàn bâng lo-
A thiamthang min tuahtu ngei chu
Zirtirtu țha, pasalțha chu!