CHALTUAIA RAM ȚUAN

Emmanuel Lalrindika Jahau
30 August at 20:56 · Edited
CHALTUAIA RAM ȚUAN
(Ballad)
Ram loh zawhin, khua pelin Chaltuaia,
Dùai a tum lo, huai taka hràn tum val,
Sapui, kawlkei hrâng leh nghovar lian pawh
A tawn dawn, a zam lo, ram a chhuak ta.
Sûl nghak Thanghniangi nghilh lo reng zelin,
Țumkawng lamtluang zawh zai rèl zel laiin,
Dùmbûr a kheh Thanghniangi bahsam țàwn,
Kuak fawp hlat hlât, sî hlârh hlârh chung zelin.
Khuatlai lo thlen tikin hràn tum val chu,
Ram loh a kai, țhuthmun dawhrem a rem,
Kawlkei, Nghaldang, Zuksial, Nghovar nghakin
Chechàng lo menin a chang zârbùk a'n.
Beng chhi-a mit len ruai ruaiin vala'n,
A nghak chhuak Zuksial chal kihreu hreu mawi,
Laifei a buat, a kau, a tin, a puak,
Zuksial nakthawl a verh, a âwn ruai ruai.
Hràn tum Vala hràn dar a ințam țan,
A keuh tluk ngei Zukdang a chhawlchhin ta,
Khua a pan, țumkawng lamtluang a tawi ta!
Khaw làn tlang a'n Chaltuaia'n tlang a tlir.
Tlangtlir thawm thangvain khua per-pur nghawr,
Thanglengi beng a'n nghawr fawn mawi zual e,
Lungdawh mualah nunau pungkhawm tuau tuau,
Hulêng val rual sa ruang tuam tur chhuak bawk.
Chawimawi nopui nen Chaltuaia'n khua lut,
Lungdawh mual nunau sahrang sem den den,
Thanghniangi sahrang zawng a bika hleh,
Nunau sahrang nen hleihte'n dang ngei e.