A ZÎNG RIAI..

Ab Six August
24 August at 06:21
A ZÎNG RIAI..
Romei zâm a zîng riai tlângah,
Thal favang turni nem hnuaiah;
Tah chuan ka thlâ a tel vai riaiin,
Ka thlira chul hnu dâwn kirin;
A lang aw! Hlim lai puang ang chul,
Luaithlî daifîm iang lo tla e.
Kumsûl veiin an liam sûlah,
Kei ka kal hma lam sâwnin e;
Pheikhai a rit lua ke pên lai,
Min au hnutiang sûl liamin;
Lâm ang lêtah ka rem bil lo,
Kal lai khamin ka muang si lo.
Tlainem turni a sen ri riai,
Kâwla a liam tur romei kârah;
Thlir lo hian ka pam lua e,
Lâm ang lêt a'n ka ring si lo;
A lan leh nân zân ral hnu,
Nikhat kan vuiliam leh thin.
Tiang rengin aw! lei hringnun,
Hai si lo a liampui kan that lai;
Uaia chul hnu kan chan nân,
Pangpâr tila vul leh si lo iang;
Tui luang iangin a liam mek zêl,
Ngaiin kan au lul lo'ng maw?
Thangvân siâr ka thlir changin,
Hmana hlim lai ka dâwn si thin;
Lungrual nau ang nuihza lai,
Lâm ang a kir leh dâwn em ni?
Tawnmang êm a zûl si loh chuan,
An liam zel dan rual chang lo.