THIAN RINAWM

Jennifer Vetopi
THIAN RINAWM

Tihtur nei lovin ka awm a,
Tih loh tur lah ka nei hek lo.

Buaina nei lovin ka awm a,
Buai lohna chuan min tibuai a;
Khawhar takin ka awm a,
Tumah ka kâwm châk si lo.

Ka thian rinawm ka ngaihtuah a,
Ka ngaihtuahna chauh lo chu
Ka tana rinawm ka ngaihtuah chhuak zo lo.
Ani chuan heti hian min hrilh:-

“I phâk bâk aiin i ban phâk neih tum la,
I duh zâwk aiin i duh loh zâwk hi i tan a tha zâwk fo,
I duh tâwk loh hi i tan a tâwk chauh fo a;
I mamawh lo ni-a i hriat hi i mamawh a ni tih hria la,
I mamawh ni-a i hriat erawh i mamawh lo fo tih hre bawk ang che.

I nunah mi tupawh an luh theih nan inhawng la,
I nun tichhetu erawh paih chhuak hreh suh;
I hlim nan thian tam tak siam la,
I hlimna tak tak erawh nangmahah a awm tih theihnghilh suh.

Mite hnenah tunge i nih tih i inhriattir hmain,
Tunge i nih tih inzâwt fo la,
Mite hriat leh hmuh danah che tunge i nih tih inhrilh lo la;
I duh dan leh i duh ang chu i nih dan nihtirin,
Chu ngei chu mite hriat dan leh hmuh dan che nihtir ang che.

Ngaihtuahna hmang thei lo khawpa ngaihtuahna i hmanin,
Mangang suh;
Puitlinna kawng i zawh a ni tih hria la,
Hlim rawh.
Tihtur nei lo leh tih loh tur nei lova i awmin,
Malsawmna i dawng tih hria la;
Chhiar rawh.
Buaina nei lova i awmnain a tihbuai chein,
Hahdam la;
Buai suh.

Khawhar taka tûmah kâwm châk lova i awmin chi-ai lo la,
I thinlung chhûngrila awm;
I thian rinawm 'Nangmah' ngei chu kawm chîng rawh,”

tiin.