R Lalchanchinmawia Kll
ZAN THLAMUANG
Chhun khaw eng tian nan
kâwl hnîmin.
Zan hlimthla inlarchhuah nan thim a hnai.
Kawlkung nguia nunkhua pawh lo nguaiin.
Zankhaw hril thim inlarin a tuam ta e piallei.
Boruak thiang reh ruai aw, zan thlamuang.
Hring fate hahchawlhna tura khuanu lo duan.
A lo thleng ta e muangte'n zanmu chhin nan.
Thla zarin a lo lang ta e a hlimthla leh riruang.
Dangro dang hnawn thintu siktui thiangin.
Chhawlhal damten dawi ang a dawm iangin.
Rimtawng chau taksa leh rilru hahchawlh nan.
Hun tha leh duhawm a ni si i tan leh ka tan.
Mahse, khuarel dan rualkhai lo vang nge.
Vanduai aizar hringnun kentel hun tha lo.
Hahchawlhna huntha aiah phurrit tizualtu mai.
A ni ve fo si tisa leh rilrua hliampui tuar tan.
Khuanu malsawm changa hun tha i chan lai a.
Hliamloh rilru leh tisa him piala i awm lai hian.
Ngaihtuah fo la i chan bika i vanneihzia.
No comments:
Post a Comment