RAM LO LA AWM TUR

Khiangte LR Lra
RAM LO LA AWM TUR

#
Ka tan chuan i mawi chuang mang e,
Mahse maw, kei i tan ka mawi ve si lo,
Khawvel mawinate hi ka thlir fo thin a,
Min thlir ve si lo khawvel mawinate hian,
Hlimna leh lawmna neih reng theih hi ka duh a,
Min duh ve si lo hlimna leh lawmnate hian,
Hausak leh nawmsaknate pawh kan zawng thin a,
Kan zawn hausakna leh nawmsakna te’n min zawng si lo,
Nunna leh damna duhin kan pan thin a damna run,
Damna aiin natna, nunna aiin thihna kan dawng nawlh thin.
A mak ka ti e, hriatthiam a har, he 'Hringnun' hi zawng!
Min zawng ve si lo heng’ kan zawn fo thin-te hian.

# #
Hei hi maw hringnun chu!
Hei hi maw mawina chu !
Hei hi em ni... Hlimna leh lawmna chu !
Hei hi maw…kan zawn thin hausakna leh nawmsakna chu !
Hei hi maw lo ni…damna leh nunna kan zawn fo chu !
Kan zawn thin heng zawng zawng :
Hlimna leh lawmna, hausakna leh nawmsakna te,
Nunna leh damna te hi kan hmu em..he khawvelah hian,
Heng kan thil zawn thin zawng zawngte hi'
Reilote atan an ni, rei reng a daih dawn si lo,
A ral ang reilote-ah he hringnun hi zawng a la chuai ang!
Ram lo la awm tur chu i zawng zawk ang u khai.