NUN AWHFAKAWM

R Lalchanchinmawia Kll
NUN AWHFAKAWM
(Chiapcha nunkhua)

Thangril laiah tapin lungdi a koh em ni,
Chhepchher khawnga zai hla mawi sain;
Leilung awitu zan chiapcha rawl mawiin,
Lungrun zualin thinlung lairil a fan zo ngei.

Lungril laia zotui luang ri her her iangin,
Ngaih ninawm loh rimawi a fawn liam e;
Zaihla mawi hringmi benga hriatthiam ruallohin,
Zanthiang reh chawiin thinlai a nghawr dim e.

A thawm thangva a mawi ngei e lungril laiah,
A hril kim e thianghlimna nun rimawi fawn velin;
Kei mi ianga phatsan leh hnawl hlawh ve lovin,
Zaihla sain siamtu fakna hla mawi an hlan.

Nun awhfakawm tak aw, chiaptin cha nunchan,
Sualna chim buai phak loh thinlung thianghlim;
A nam ve love an nunah hringmi zia itsikna rim,
Nunkhaw chenin am e an hun hlu neihchhun.

Hringnunah erawh buaina chhum zing thinin,
Famkim lo he hringmi nun felhlel tak hian;
A phak ve si love an ianga nunchan zir,
Hransan mai ka nuam thin e rairah riangin.

Aw, theih chang han ni ve sela an dungthulin,
Hringnun buaina tuifawn chim phak lohin;
Amte'n nun hmang ve ila zalenna famkim nen,
Chantawk khuarelah lung reng a awi ngei ang.