BEISEINA KAWL ENG

R Lalchanchinmawia Kll

BEISEINA KAWL ENG

(Lehkhathiam hna hmu lo fuihna chhamhla)

Rairah lunglai hnemtu ber thiam zirna run,

A ding lur e thiam zir naufa lengtin kai nan;

Rianghlei chanhai parang lo vul ve hun,

Thlirin lengtin lawi kim e leirem rah ve nan.

Zaleng zawng an kim ngei e thiam zir runah,

Zirna hmanga retheihna hnehbàn tumte'n;

Rualkhuma than tum leng ngir khup karah,

Hum an hauh ve e beiseina sang tak nen.

Hmatiangah zirchhuah ve hun tur nghakin,

Rinna tak meuh meuhin hma hun an thlir;

Inhmakhawsuih nan an siam e hmachhawp,

Bei nge sei ang rundung zawk niang tiin.

Neih sumpaiah chhuan tur nei zo ve lovin,

Kai pha ve lo mahse zirna run in tha berah;

Pau tikhauhin ka tum nge ruh saruh lo ti e,

Taima takin an zir fan fan e rualkhum tumin.

Rual el leng theihtawp chhuaha bei ta na chu,

Khuanu paw'n hualin a voh e malsawmnain;

Tluang taka zirlai pawh zir chho ve zelin,

Hma hlenin hlawhchhuak ta e hlawhtlinna.

Chutin, an thiamna leh an finna zawngte,

Ram leh hnam tana chhawr tangkai tur leh;

Chhungkaw chawmna tura eibar hmuh nan,

Thawh tur zawngin an bel e ram rorelkhawl.

Mahse, thiamna aia zirsan pawimawhna hmunah,

An vai leh si hmelhriat tha an aiawha ding tur;

Awmzia a nei ne'maw kha chen an beih ve-nain,

Mumang iang a thamral ta an thinlung ruahman.

Beidawnnain lu chungah thla zar duai mahse,

Engah nge beisei bova i rum reng bik ang a;

Engahnge lungngaihnain a kaihkun reng ang che,

Thlir teh, i hma beiseina kawl rawn eng kha.

Ami lengte chu lunghnual fo thin mahse,

Beidawnna tuktlawm leh hnehban rual loh;

I kawl lai ngei thiamna leh finna zawng kha,

A ni dawn lawm ni tun hun atan ngei hian.

Dawn ve teh, i zirchhuah tawnhriat zawng kha,

Awmze nei lova utawk tur vawn mai tur chuan;

A pamhmai lua e i tha leh zung senral zozai kha,

Mahni kutkea ding turin bei ta che i chaknain.