A NI A, A NI!

Tea Renthlei Tianghawl
A NI A, A NI!

Hlimna chu lungngaihna kawng min hawntu a ni a,
Lungngaihna pawh chu hlimna chuanchung min hlangkaitu a ni;
Lawmna chu tap tura min buatsaihtu a ni a,
Tahna pawh chu hlimna hlimawm min hlui tura kawngkhar vengtu a ni.
Zauthauna chu nguina thlen tura thang valh a ni a,
Nguina pawh chu zauthauna kan neih nana a zângsi pawimawh a ni;
Nuihna chu rûmna ruam kawng hawngtu a ni a,
Rûmna pawh chu zâ êm êma kan nuihna tura vengtu rinawm a ni.
Thlamuanna chu hlauhna kan hriatthiam theihna tura duan a ni a,
Hlauhna pawh chu thlamuanna muanawmzia min hriattir tura siam a ni.
Lungawina chu thinurna tawngbaw tura kan zakzeh a ni a,
Thinurna pawh chu lungawina neih harsatzia kan hriatna tura kan chhipchhuan chu a ni.
Ngaihdamna chu huatna hlauhawmzia kan hriatna’na duan a ni a,
Huatna pawh chu ngaihdamna ropuizia kan hmuh theihna tura kan mit haihawngtu a ni.