H makhawsâng Chhurbura rual

Joseph C Lalhmangaihzuala

H makhawsâng Chhurbura rual, Tuan leh mâng ata,
Vanhnuaithâng an hril, ‘Thlanrawkpa Khuangchawi’
Sadawt, Bawlpû chhamphual, zeldin thubawl karah;
Ran thisen chikim hmangin inthawi e, Ramhuai tlawn nan;
Hawp khawp thar tum zaleng te’n tuanzai rel e,kawla ni chhuak chhiarin,
Mihrâng thanlai siam tum thangchhuah, khuangchawi tura pheilai thenin,
An sel e, ‘milu’ ‘salu’ khai lo mipa fa;
Chutin Se mân tur lânu te an leng e,
An ngai bil lo, thlang sappui nunsâng.

T iak zai reng rel lo hnam nunphung kalsiam, mahse,
Chutah, mihrât khawkhêng chanchintha meichher chhitu;
Harsatna chitin paltlanga Isua chanchintha puanhnuaiin,
Awmtual an thai, kan zoram riangte-an;
Chutin sawisel elrelna karah an hril vel,
Zosap hmachhuan Isua Krista chanchintha.
Hranghlui pasaltha pheisen darfêng, 
Mihrâng sahrâng hma a zam ngailo, 
Kâwltu chawi a,ramtuan rel lawmnu lawmpa rual û zawk leh nunau te;
An nem zo dârtui iang chanchintha tawn ah.

R authlâ iang phung hawrawp atanga AW A B Z CH chhamin,
Zirna run an rem thlang sappui nun iangin;
Chutin lo thangzel in Isua Krista chanchintha meichher chhitu,
Pu Owena leh zokhaw sulsutu te’n an din tak e 
Sakhming mawi KRISTIAN THALAI PAWL
Tlâng chuan e, zoram dung leh vang ah,
K.T.P kan ti mathlawn lo zofa zaleng zawngte’n;
Kan chawi zel nang e, thang leh thar zel an,
I mawi chuang e, I sakhming;
K.T.P., Kristian Thalai Pawl. tiin.

R ih lipui mihrâng thlafam run kaina pialral sawngkâ ianga 
Krista sipai rual laitual lenna tur Zion khawpui panna lamtluang
Siala zawh turin kan sawm vel e, Vanhnuai zaleng zawngte:
Ani, Hun hmasa lam, chutih hunlai chuan-
Tlan chungin mi kawngkâ ah dâkin ‘Isua hi lo ring ve rawh u’
Tih kha sermon ropui tak a ni thin a,
Tunah zawng kan thinlung alo chawlawl zo ta;
Sualthim rallian in min hneh zo thang leh thar zingah,
Camping leh crusade te pawh menah kan thlak zo ta.
Tawkfang tal cham thei se kan thinlungah chu chanchintha chu!!!

P hungvelh ang maia khawvel sualna pung karah
Vahbâk ianga hlemhletna huaisârin, ruihhlo chitin ngai lah pung tual tual;
Khawikipah sap tawnga mahni hnukchhat tawk lah bo lo, 
Mami Mama ti-a tuai duh lawmlai famkhaw zin tum hmachhawn ta-in,
Mittui tla zawih zawiha chun leh zua luaithli nul a bang thei ta lo; 
Soddom leh Gomora sualna lah pholeng iangin, 
Isaka aia Ismaela hmakhalh tir tum, a langa mawi kristian thalaite 
Kan tam lua ani lo maw ??? ‘Thalaite u, in thatlai chen ula’
Tih thupui chauh changchawi tute;

C huvangin he hun hmawrtawng tawh tak ah hian –
Simna dik tel lo, sual zia inhria a inchhir ta piangthar mek te,
“Thianghlim rawh u kei ka thianghlim si a” titu 
Pathian hma a dinpui turin alanga mawi Kristianna malmâk ila
Setana dawibur ruihhlo chitin, hlemhletna tenawm
Nulat/tlangval bawlhhlawhna lakah in thiarfihlim turin
Tun hun hmawrtawng taw tak hun tlemte kan la neih lai leh,
Pathian zahngaihna hnuaia tihboral lohva kan la awm lai hian;
Tapchhak hnungpuaka lo in ti ‘Pa’ mai lovin emaw,
Nulate’n kan ‘Absaloma’ tur ringawt zawng lovin –
K T P thiltum, ‘Isua Krista rinna leh amah anna kawnga thalaite hruai
Kohhran kutke ni tura thalaite buatsaih
Kohhran hnathawh tih puitlin
Krista chanchintha puandarh
tihte leh kan thupui innghahna Ephesi 2:10
‘Thiltha ti atan Krista Isua ah chuan siama awmin
ama kutchhuak kan ni si a, chu thiltha tih chu
Kan awmna turin Pathianin a buatsaih lawk a ni’
Tih hrereng chunga mi âk ruala âk mai lovin he sual thim kulhpui hi
Vauchher ila, hnuhpui mai duhtawk lova sirsawnin,
Hnuhhram kawih ngei mai piahah a thual thlengin,
Ralpui phiara phiarin, ruang chaicheh thlak ila;
Kan rilru, kan taksa, kan thlarau tan leh kan thalai puite tana
Malsawmna hnar kan lo nih theih nan
Kan zoram riangte hi Kristian Thalai Pawlte hian 
Hawh u, I dinthar leh ang u. 

Amen.
KRISTIAN THALAI PAWL
(Psalm)