En teh, Fam Lalzova chu,

Pa Marema Thaibawih
NGAIHLUNGDUM

En teh, Fam Lalzova chu,

"Kumtluang lungkham ka luah loha ai chuan,
Fam ila kan chhimtlâng khawdai ngeiah,"

tiin a au vawng vawnga asin!

Ih maw, kei pawh mahtêa maltlatin,
Mamitchhîng chungin ka meng reng a;
Ka thlîr reng che kal hnu, hawi sawn loin,
Ka hmu che asin, mitthlain.

Min hnuchhawn nî khan tap loin mi ring em ni?
Ka thlîr che i liam tur, min hnawl nî khan,
Châwnbân ka vai che, phar loin;
Min hawi ve si lo, hransan ka nih vàngin.

Ih maw, thûva awmhar mah hi ram Zodaiah,
Lunglên thu an hril an tia sin sâng thinglêra'n;
Engtin thlah nân biahthu kamkhat tal,
Min chhàwn ve loh ni le, kei hi? 

Chutin lênthiam mûvatêa’n chang thei ila,
I liamna zo lêr lûr tlâng khûma thlâwkin;
Kir zai rel lo chu ka au nâ’ng che ka lo ti,
‘NGAIHLUNGDUM,’ ti hian maw! 

I ngaih leh khawtlâng lunglen a rual em ni hei?
Duh leh zatlângin min sêl se,
Laitha a zâm lul lo e sakruanga'n;
I ngaih hi ka do zo si lo, engtika'n pawh,
I ngaih bâng thei lo lairil sûk fai tum mah ila,
A fai thei lo e, a reh thei chuang lo, i ngaih hi!

Kal ta ni mah la ka hlàn che nghilh loh nân,
Thilpêk tlâwm chu ka pe che ‘keimah’ hi;
Ka hnutchhiah ta i hnênah, i enkawl atân,
Eng chen lo vuan che maw tih pawh dâwn loin!

Kei chuan malin ka do ang, do zawh rual loh chu,, 
Fûr leh thâl inthen khawtlâng lunglên mah hi,
Tuar zawh a har an lo ti asin zalêngin;
Engtin nang nên kan inthenna khua sei tur,
Kei hian tuar zoa min ngaih ang ni le!
Nakinah chhuahtlânga’n Leltê a lo kiu leh ang a,
Kan nun nghilh har hi a thar zual awm mange.

Chutin fam ta lo chu chhûnni zan tam a ral hnuin,
Hawikîrin ka lam lo lêt leh ni thei mai teh la,
Ka lo hmuak ang che i lo lêt chuan, dailungrâwnah,
Ngaiin ka lo hlân ang che, kan thliah hman loh chu!

Mahse “Dam takin aw,” ka tih che a tul si a,
Suihlunglên khua zawng a sei dâwn a ni;
Ti raw(h) maw?!

tc lrs — at Ngaihlungdum Poetry Institutes.