THINGLENBUANG DAIHLIM NUAM

Khiangte LR Lra

THINGLENBUANG DAIHLIM NUAM

Tuar reng ahar vawiin chung tur-ni meuh zawng,
Phai khawlum iang rengin zoram pawh a lum zo ta e,
Zo daifim leh thlifim thaw hiau hiau thin te kha,
Khawilam tluang nge an zoh tak le.

Ka bel nang che aw... nang thinglenbuang daihlim nuam,
I zar an bel vahkhuai leh phengphehlep mawi te’n
Sirva hram thiam leh lelthang te'n zaiin an awi nitin che,
Kei pawh an iangin ka bel che... i zar daihlim hnuai nuam tak chu.

Nang erawh mitin rengte tana chawlh hahdamna i ni a,
Hringmi zalengte zawng maw phunnawiin kan vui vai thin,
Ni chhun sen-sa leh thal khawlum thaw huam huam chu,
Nang chuan maw ngawi reng leh phunnawi lovin i tuar mai thin.

Thinglenbuang leh siahthiang hnah-nem tinreng te’n
Min pe thin boruak thianghlim leh daifim nuam tak chu,
Hringmi leh ramsa tinrengte tana chawlhna nuam chu i ni a,
A hluin ava hlimawm em, kan tan renga khuanu’n alo duan chu le.

Zoram chhim leh hmar chhak leh thlang ah,
Thing leh mau ze tinrengte an ding sii siau ve,
A mawiin a daihlim nuama chawlh reng mai hi kan ning thei lawng e,
Kit mai mai lovin enkawlin i humhim zawk fo ang u khai.

Aw ka va ngai em thinglenbuang daihlim nuam rii riai te kha,
A ngaiin chhawl ang ka uai hni-hne e, chhuihthangvala hi,
Thal khaw-lum leh turnipui sen sa rum rut te chuan min pe lo,
Hahdamna leh chawlhna nuam chu min pek an tum si lo.