VANGKHAW SUMTUAL SENMEI CHANG E

R Lalchanchin Mawia
VANGKHAW SUMTUAL SENMEI CHANG E

Ka dawn ngam lo rairah riang an chan.
Vangkhawlaiah hlimte'n dârang lenlaiin.
A lo hrâng e dan rualloh tualral lian.
An neih rosum riral zo e tualrawk tuarin.

A mak em e ànpai ral lian mah ni si lo.
A na em e ralram thlangkawr mah ni si lo.
Unau hmelhai hun thim a thleng ta em ni?
Hun hlui inrun hunah an kir leh ta em ni?

An phal lo maw sumtuala laitual lên ve.
An nuam e kangraltu sen mei rawih.
Thin a thawng zawr zawr rikrapna rapthlakin.
Hlauvin tik dial dial e ar mu thamthelh iangin.

Senpa aw meipui ral lian lo hrangin.
A hliau zuai zuai e run in zarhliap.
Tap chiau vawr vawr e nunau mangang.
Dan rualloh luaithli luang e pachang biangah.

Thlir ngam bik u maw run in senmei chang lai.
Thinlai a hnim lunglai a na vawng vawng.
Tapin an rum an sabiak a nuar em ni?
Heti kauva hun rapthlakin a chim bik le?

An fel kan tibil lo mahse khuanu'n a hual.
Sumtual nghak chimloh nunau sial ang ngir e.
Kha chen ngaihngamtea tual an lenna sumtual.
Rin loh karin chang zo ta si e vutdurah.

Ram hmangaihna thuam inbela hnam hma-ngâitu hmakhawthlirna tarmit vuaha thlirtu tan pawh, zêp nâk emaw, thlirna kil dang vak a awm thei tlat lo. Ni e, nunrawnna kuthnua an puhthlu phal ngang lo a nih pawhin, hmangaihna sulhnu themte liak pawh a lang lo tih hi phathul theih a ni hauh lovang le. Hmelma chu neih ngai a ni a. Huatna thinlung vanga tualthu chhiat chang chu awm bawk mahse, a hleihluak taka chet hi chu a Mizo kristian zia lo deuh chu a ni. Heti kauva hleilêna nunrawnna laltiang vilik tur hian eng ang fakauva fel famkim nge kan nih bik le?