VAL ZAWMTHAW-A

R Lalchanchin Mawia
VAL ZAWMTHAW-A

Kalsiam nan khua sang mahse vawiin chu.
Laiah tha a zâm ne'maw hmachhawp hlen nan.
Thinlunga tihtur ruahman chi hrang hrangte.
A eng ber nge thliarthiam lova inkhâp fan rengin.
A thlang ta e zelthel taka nichhun vui liam.

Hmana rualtin chhing rualel than tum valtha.
Lengite mit fukna ber chhuihthang val santha.
Chham ang zal e awmawl leh eitui lungkhamin.
Engah thatchhiatna rauvin a bumrova.
Engah ngurchuaina rauvin a bawhbuai fo le.

Than tum valtha kallai kham tur rengin.
Dang kawlawk reng e zawmthawtnain.
A lo ni e hmelma kumhlun tlakchhiatna bul.
Hnehin tuktlawm thei se pau tikhauh luiin. 
Hmatiang sawnin kai ve maw e raltiang ram.

Vawiin khua chu tihtur tih zung zung nana itawm khawpin khua a sang a. Amaherawhchu, ka thinglung ruahman, tihtur hmachhawp chi hrang hrangte hi, a eng ber nge ka tih hmasak ang tihah valbuaia ka buai leh ta tlat mai a. Chu chuan rokhawlhna khawlhkham tak min siamin min dang kawláwk laklawh tlat mai a nih hi. Thatchhiatna rauvin min bawhbuai lo se chu, eng emaw zat hi chu ka ti zo tawh âwm si a le... Thatchhiatna hi zawng ka hmelhlun, ka tuktlawm hleihtheih si loh, thil huatthlala tak zawng a lo ni chiang khawp mai. Ka tihtur mang mang pawh ti thei lova min bumrovin min tichhe vek ang tih pawh ka hlauhlel love.