RUAH.........

Khiangte LR Lra
RUAH.........

Ruah hmi a tla ser ser… tla ser ser…
Naupang ten lawmin an do, an huh zo ta,
An nu leh pa thinlai hrang chuan vin tuar tuarin,
'Mami', 'Mama', "In huh zo vek tawh a lawm !!”, 
“Lo haw vat rawh u” tiin an au chel chul. 

Ruah a tla tuam tuam… tla tuam tuam…
Hmanhmawh theih tawpin mahni in lam pan chungin,
Losul feh an hawng, huh zawr hnep hnup-in,
Leilung rah thlan thiam ahar ngei an ti,
“Awi, ka nu !! Ka tawlh thlu dawn” tiin an te..!!

Ruah a sur hum hum… sur hum hum…
Tui-um leh tinpui, tui thawl neih zawng zawng te,
A khat loh hlauvin an thal zung zung,
A dir chur chur, a baw hawk hawk tui dawn atang chuan, 
Kawr-te ruam lam pana ri hum hum humin aluang huau huau.

Ruah a sur cherh cherh… sur cherh cherh…..
Zantlai baw’-ar te’n siang lawiin an run an bel,
An iangin kei paw’n kan run nuam chu ka bel ve, 
Laikhum zawlah silhpuan thleh nem sinin,
Zan mut chin har kha aw…a awl ngei mai.

Ruah thimpui alo thlen meuh tawh hi zawngin,
A hrang lua e, ri dur dur leh phe zawr zawr-in,
Virthli leng chu ahrang a,Van rial ngenmu iangin lo sur e,
Dimna reng nei hauh lovin maw, 
Kan run innghahna ber pawh i nuai chim tak le !!