PAKHAT TAL AN AWM LAWM NI?

R Lalchanchin Mawia
PAKHAT TAL AN AWM LAWM NI?

Dik leh fel taka rorelna laltiang lek thin.
Dimdawi bik nei lo dan khairual chelektu.
A mamawh em e kan ram leh hnamin.
Tu nge inpea ram tana penchhuak ngam chu?

Hmasang ata leilung kal dan phung rênga'n.
Kung hlui til na ngai hnah thar an duah.
Kan ram erawh ramhlui ziain a lailum a luah.
Engchen tak chelh zai rel zel i maw tar tawmkailo?

Mahni sahmim puar nan ram hmangaihtu haiin.
Mitdel kalsiam ianga ar khawthim daiin.
Inchhuihbah raptleu kan insawh sil awng awng.
Humsual dai chu ram tan a pawi vawng vawng.

Rawngbawlna hna a ni ram hruai hna hi.
Hlawkna ni lovin hlohna a lo ni zawk si.
Tunah erawh sum siamna hmanruaah chantirin.
Pamham takin ham buan buan e chan loh hlauvin.

Hmuihmer hmu hmui a mawm hmiar hmuar.
Eiin hmu tha pa dul a kiar hiar huar.
Ram thau sawktute chanvo tur renga voh.
Vanneihna aitha ram rawngbawlna maw?

Ram hmangaihtu pung velh ang pung leh hluai e.
Ze chhungril thupa ram fate vehthlemin.
A lo thleng leh ta maw ram hruaitu thlan hun.
Thlan thiam a har thlunglu a hai ngei e.

Ram hruaitute hi, tling lo riauva hriain selin sâwt sâwt thin mah ila, eng kan hria ni maw? châng dang kan tum lovin a ngai bawk kan thlang tling leh mai thin a. An zuna kan uai laklawh tawhna hian inthlan meuhah chuan kan mit a tidel leh tlat mai thin. Thing hnah hlui pawh tla kawlhin hnah thar a lo chhuak leh thin angin kum upa leh an rorel dana kan duhkhawp tawh lohte hi chu thlingthlawnin mithar tan hmun kian ve tawh sela a tha khawp mai. Annin ken an tum lem loh pawhin a thlangtu mipui tal hian kan vote hmangin chelh lui hram lo ila a tha khawp ang.

Inthlan a hnai leh ta a, ram hmangaihtu vek an rawn inhnar leh huang huang ang a. Therhlo eng eng emaw min tiam zut zut phei chuan, vote loh kan hreh leh rûm bawk si ang a. Mithar duhin iak iak thin mah ila, mahni sahmim tihlen theihna tur kan ãwn ru leh tui ang a. Kan chhia leh hriatna, duhamna tuiin a pawlh nut chinah chuan, mi tha, ram hmangaihtu tak tak haiin kan chhia leh tha hriatna firin min pawmpui theih miah loh pawh kan vote leh mai lovang tih tunge sawi thei?