KAN PHAL LO IN SAKRUANG RIAL ANG A RAL TUR HI

R Lalchanchin Mawia
KAN PHAL LO IN SAKRUANG RIAL ANG A RAL TUR HI

Kan hriat theuh angin Laipuitlang leimin vanga chhiatna chuan a rampum thinlung nghawrin a sawi nghing dual dual a. Vanduaina tawk chhungkuate tawrhna, thinlung taka hriatthiampuitute chu, khawngaihna leh lainatnain kan lungno sa a rawn luhkhung a. Bilhpuan khima luaithlinulin lungngaihnain kan lu a kàikun a. Kan tap kun tlawk tlawk mai a nih ber hi maw...!?

Ka'n ngaihtuah thin a. Khua rawn thimin chunglamah khawpui a rawn ri rum rum a. Thlipui leh ruahpui vanawn nen a siruk lain a rawn thawk ta mup mup mai si. Kawmchhak lawka chhiatrupna thlen tir mai thei PWD In, vanduai Mangkhawng to luah mai avang chuan thinthia mu lovin hlauthawng reng rengin an awm ang a. Chutihrual erawh chuan, heti teh thut thil hi chu a thlen tak tak loh beisei rûkna chaurau tak nen chunglam kuta inkawl tir chunga vengtute thlirna tarmit vuahin, nghakhlel takin khawvar hun an thlir ngei âwm si a. An va lainatawm tak em!

Engle khaw le, thiam turah min ngai tehreng emaw ni? He vanduaina lamhawia chhamhla phuah ve turin kan thiannu'n min phùt tlat mai si a. Ka tilthenna lam ni em em mah suh se, a zahawm fu roh si a. Heti hian ka'n chhai chhin ve ta poh a nih hi.

"Chungvan rum hum hum mah tihkhai changin.
A sawm vel e ruahpui leh thlipui lungrual puiah.
Thihna hlimthla leh riruang inlãr nan renga'n
Thla zar duai e thim lal rorel hun zan rapthlakin. 

Khua ruat hringmi hahchawlh nana duan.
Khêl loten lo thleng leh na e zan thlamuang.
Mutmu tuah theiin an mawi ne'maw thinthiin.
Muangten laikhum zal loh nan thauah man e titnain.

Vanduai tuara vanpui lo chimna tur rènga'n.
Sur buan buan e thimpui tothang khuangruah.
Chhiattu zualko thu keng vanduaina samsàr nei.
Chhungpui bawrh thintu minpuiin lo chhàwn. 

A hrâng lua e sárpui kut thihna nunrawng.
Chimloh tuaiduh lawmlai lêng pawh zuah lovin.
Khuarêl vanduainain an chungah thla zârin.
A kai lui ta e fam khawpui sianga lawi turin.

Rilruin Ar bo a zawng ruai e puhmawh tur zawngin. 
Hringmi fimkhur loh rahchhuah kan tel nge.
Dan rualloh khuarêl kan chunga lo thleng zawk?
Remti lo mah ila kan thu si lo thihna chungthuah.

Muangleiah chhungkaw hmakhawthlir siam a.
Duhtin sama chhungkim dar ang lenlaiin maw.
Dan rualloh khuarel thihna a lo hrang si. 
Kan phal lo in sakruang leidaia rial ang a ral tur hi.