KA NGAIH LOH CHE RING SUH - II

Zirtei Mangpa
KA NGAIH LOH CHE RING SUH - II

Nipui khawlum mawitu sarawn par te,
Run mawi chinpar tin leh ram pangpar nen;
April-par pawh May-a an vul tikah,
Ih maw, Mate, ka ngaih loh che ring suh!

Furpui khawhnawng karah khawpui ri te,
Van rial rum leh Nikir khawcheng te nen;
Ruah sur zawha chhimbal a zam tikah,
Ih maw, Mate, ka ngaih loh che ring suh!

Vangpui khawthiang awitu sirva leng te,
Lentupui leh romei, si-ar zawng nen;
Chhawrthlapui paw'n vanzawl a kai tikah,
Ih maw, Mate, ka ngaih loh che ring suh!

Sikpui khawvawt chawihtu tlaizawng par te,
Zamzo, chuailo, ainawn, kumtluang par nen;
Chawngmawi, Hrangchhuan indi i tawn tikah,
Ih maw, Mate, ka ngaih loh che ring suh!

Hunpui inher vel leh kumsul vei te,
Damlai kawng chhuk chho-a vaih chang te nen;
Thawm tin kara reh ri a rin tikah,
Ih maw, Mate, ka ngaih loh che ring suh!

(30.4.2013)