HMANGAIHNA MAK TAK CHU A LO NI.

R Lalchanchin Mawia
Khawi'nge 'hmangaihna' hi thutluang pangngai chuan ka ziak tawh nain, a chhamhla zâwng hian ka'n chhai chhin ve reng reng teh ang.

HMANGAIHNA MAK TAK CHU A LO NI.

Hriat loh thu inthup hriatthiamna ber.
Hmuh loh lang lo ruam hmuthiam thintu.
A lo ni e nula tlangval nuna tlaina ber.
Hringmi chanvo ropui ber hmangaihna chu..

Hrilhfiah tum ve u khawi atanga lo intan nge?
Engtianga lo piangchhuak nge hriat tum ve u?
A lo ni e tehkhawng bulfùk fak awm lo.
Hringchan tinuam thintu hmangaihna thu.

Hringmi hriatnain chhûtin chhui thin mahse.
Mifing finnain zawngin zawt thin mahse.
A lo ni e bui leh fafu ah pawlh ang mai.
Thinlunga inbuan let reng thin hmangaihna chu.

Hrilhfiah rual loh thinlung chhunga bu khuar.
Chuti kauva mak thinlung nghawr nghing thei chu.
A lo ni e thiltihtheihna mak danglama thuam.
Finna dawi leh âtna hlo keng hmangaihna chu.

Hriat fiah rual a ni ne'm hriatna satliahin.
Chhût chhuah rual a ni ne'm chhutna satliahin.
Hlawhchham fo mah u pawnlama thlirtute.
Chianna erawh a awm si thinlung chhungah.

Zawnglai lengpui par parchhuah ve nan.
Mize inngainatna atanga intanin ngaihsannaah.
Duhna naran lo piang inngaihzawnna chu.
A lo thang chhuak thin e hmangaihnaah.

A changtu mize mil zela thawk thinin.
Sang tak phût fo thin hmangaihna chuan.
A hun hmaa chawhthawh a nih ngat chuan.
A ngenin a ngiat thin pumhlan inthawina maicham.

Fianrial ngainatuten hmun fianrialah.
An hlan thin e pumhlan inthawina maicham.
Chutin fianrial nena inzawm tlat khawharnain.
Nangchingin an tlu lut thin inchhirna khurpuiah.