FURKHAW HNAWM

R Lalchanchin Mawia
FURKHAW HNAWM

Chungkhua ri e Tothang khuang ruahpui nên.
Hringmi tihkhai ze hruanghrau rum dur dur.
Tekpui de zuai zuai rial rûm nghawr der der.
Duai khua tlang leh mualtin hnim ri riai
Hnâwm khaw chirhdiak kawi tuallei nâl pir per.
Chhum zin hnan nun ipik boruak rit cherh churh.
Furkhaw hril lunghlui thotu ni si e lunglengmi tan.

Lunghnual fehpa kalkham kungruah paw chi chiai .
Duh loh hnim hlo har chantirtu tur mah niin.
Châwmtu tuh thlai tiak than len nân rêng.
A lo ni e maltin sawmtu hnahnêm thlai tân.
A rêl thiam ngei khuanu'n hringfa lêng tân.
Hnawmhnawk kara lunghlu thami iangin.
Chanvàwng aitha ni tho si e hmuthiamtu thinlungah.

Fur khaw pik chênchûn hnuaiah hi chuan thinlung pawh a pik chûn mai thin a. Khawpui ri kal ruah ruah leh tek tla de zuai zuai kara rial rum vung vung maite hi a tihbaiawm zawnga dawngsawngtu thinlunga a rapawm viau laiin, mi lunglengmi tan chuan, a kum thu hlaa lunglen kaithotu a ni ve thei tlat lawi a. Nunhlui rawn thual thar lehin lunghlui a inchawktho leh mai thin.
Engle khaw le, ruahsur vanga pawnchhuah hleih theih loh te, khawlai diak kawi zuk mai leh boruak hnawm churh maiin nunphung a tihkhaihlak fo lai hi chuan a chhia zawng zawng bela hnualsuat mai hi a awl thin khawp nia. Amaherawhchu, a lehlamah chuan kan tana tha tura khuanu duan, kan thlai chi tuhte tiak tira a thanlen zelna tura chawmtu pawimawh tak a ni ve leh lawi a. Chuvangin a hlutna hmua hrethiamtu tan chuan malsawmna hnar duhawm tak a ni ve leh hlauh thung si a nih hi maw...!?