KHUA THAL LEH DI ZUN.

K Rohmingliana Valpuia
KHUA THAL LEH DI ZUN.

Turnipui hráng leh reh ri kara'n maw!
Chhun khawhar leh suihlunglen a na e.
Di ngaihna nun lunglenna bâng suh maw!
ZO thli, dam ten chhem kiang la ka ti e.

Awi karei! Thal romei zam karah maw,
Tuahpui leh vaú vulmawi chu an vul tâk!
Nun lunglenna chûl ral si lovin maw,
Nauban leh Ainawn te pawh an vul tâk!

Lelte nunnem tapin di i zawng a,
Ngaiin i au maw siahthing zar belin.
Kei paw'n ngaiin ka au ka di te kha,
Thlehnem riang bela laikhuma zalin.

Turnipui vangkhua leh nichhûn di-pui,
Lelthang kiu leh thal romei zâm kara'n,
Hriat loh chhingkhuak kan kai e Lungrunpui.
Aw, hringchan khuavel nun tawnmang chhaiin.

Sirva zaleng lungrual dar ang chhaina,
Chung vanzawl lentupui chawi vel kara'n,
Rairah kan nun phenglawng rimawi zaina.
Awmhar di zun ngai riakmaw iang thâmin.

Aw, ka rauthla vakvai va kal ta la,
Lal nunnemi run va lawi nâng che aw.
A ânka damdiai nem ten va chhawn la,
Chhing mittui erawh sur tir lo'ng che aw.