ZORAM THALAI AU-HLA..

Htluanga Hruaia
ZORAM THALAI AU-HLA..
(Rethei thinrim bânah mi duhâm thisen rim a nam thin....!)

Kan nun, hringnun ka chham dâwn e,
Misual lungfing nunmawi hmelthate kha;
Kan ram, hringnun ka sel dâwn e,
Buantu lungfing pawi tin kâwitute kha.

Hmânah khân i nui hapui tâwp langin,
Nun tlâwm sakhmel iang i meng dil dei dui!
Bânah i vuan chibai tha-mi semin,
Nun tlâwm sakhmel iang i meng pha dei dui!

Ram kalsiam sâwntira’n mi tiam a,
Hnam kalsiam thantira’n mi tiam a;
I seih leh sawi vàngin kan kut kan pe che!
I tiam leh tum vàngin kan kut kan pe che!

Hun herin hringnun hleiten a dang a,
Din leh hmun dangin nang i lian a, kei ka te!
Nun herin hringnun ngàiten a thar a,
Tlük leh din fâwmin kei ka rüm a, nang i nui!

Thlangtiang nun hlu kan thlir, rual kan awt,
Sawi bâk peih lo lungfing kan ai i lo ding!
Chhaktiang râl ram kan thlir, rual kan awt,
Vah-bâk rungmal mawngtawih iang i lo ding!

Chhüt rawh Inti-lungfing hmangaihtu der khân,
I mi vawnna kut lum kha a la dai hauh lo a nia!
Dâwn rawh nang lemchan thiam Inti-fing khân,
I mi tiamna thu hlu kha kan hai hauh lo a nia!

Khuanu zârah damna lui kan la kuan ve zel a,
Kan zâra i pingpeina lamtluang erawh a zau tual tual;
Khuanu zârah vaihna ram kan la buan ve zel a,
Kan zâra i intihveina rün erawh a lian tual tual!

Sit-nuih chunga i zungtang i vai khum keini hian,
Tlawn-nuih chunga i hnung zui reng kan tum bik lo!
Vei-nuih chunga i thlunglu i thin khum keini hian,
Kan chhunrâwl i lambun vànga i dul kiar kan hai lo!

Hei hi ka hrilh a che, nang Intifing kumhlun si lo,
‘Rethei thiam thil hi a sâng lua lo em mai’ i ti maw!
Hei hi ka tiam a che, keini rianghlei naufa hian,
Rethei thinrim bânah mi duhâm thisen rim a nam thin tih hi!

(20.03.2012-Ht)