SI, SI LO.

Htluanga Hruaia
SI, SI LO.


I. Suihlung leng reng rengin hun leh ni ka hmang liam thin a,
Lunglam vaia tlai ni ka len thinzia erawh i nghilh leh si.
I hlimna thlen theitu nih tluka duhsâm engmah ka neih loh laiin,
Ka lungngaihna belh chhah nana meipui chheh erawh i hreh hauh si lo.

II. Tawntirh lai hun leh dârkâr lam thinlungah a la lian fo thin a,
Nang erawh chuan sam ang then ni chenin i nghilh leh si.
Lam ang leta ka tângah rawn bei leh tura ka la beisei lai chein,
Kir tawh lo tura hnutiang chhawn a, hawilopar tawn i hreh hauh si lo.

III. Lunglenna chawk tho turin tharum ka tan hman a ngai lo va,
Ka hriatrengna atanga hnawt bo tur chein tha reng ka nei lo si.
Nang vanga tinrenga mualpho pawh ka inhuam em em laiin,
Nang erawh chuan mualphona ruama ka tluk pawh i pawiti hauh si lo.

IV. Hlimlaini mawi taka a pâr lai hun kha ka la ngai fo thin a,
Nang chuan lungngaihna ruama hruailuttu-ah min puh leh si.
Engkimah a chhia zawng zawng tuar mai pawh ka inhuam laiin,
‘A la tâwk lo a ni..’ tiin, ka dam ve nan min kai chhuak duh si lo.

V. Lunglam vaia kil tin hrutin ka rum chiam chiam thin a,
‘Mi â a nih saw..’ tiin, hmusit takin min nuihsawh leh si.
Atna ruama ka tlu lut hi nang vang a nihzia a lan laiin,
Ka fin leh nan khârtung sawn zai reng i rel duh leh si lo.

VI. Chhawrtthlapui lo en châng hian, nang ngaih a zual thin a,
Chhawrthla eng erawh i tan awmze awm lo mai a ni leh si.
Zantiang si-ar khi lunglen hnema’n thlirpuia ka sâwm lai chein,
Si-ar engmawi, lungchim taka thlirpui atan chuan mi thlang leh si lo.

VII. Engkimah, eng hawi zawng pawhin ka hmangaihna a dai ngai lo va,
Engkimah, eng hawi zawng pawhin mi thlauh thla thung si.
Tling lo inti chung pawha nang bânsan che hi ka tum loh laiin,
‘In then mai ang..’ tia thu tâwp sawi turin hun tam i nghâk duh si lo.