MUTHLUMNA HLO MAI MAW LO NI LE!?

R Lalchanchin Mawia
MUTHLUMNA HLO MAI MAW LO NI LE!?

Ami tuaiduh lêng thlafam rùn kài nan rénga'n.
A lo hrâng e damna dawi keng thintu kha.
Chimloh tuaiduh lawmlai hringnun par vul lai.
Tliakin a lo chuai ta maw ruihhlo lo chan vangin.

Khuanu'n awm lo ata awmah dinchhuakin.
Hringmi lo changa duatten duah hluah hluah in.
Saisen tet ata chun leh zua lunglawm kimna.
Tuai duhlai enchim loh lêngpuipar lo ni e.

Duatten hmangaihnaa chawiliantu chun leh zuate'n.
Nghakhlel takin an thlir reng thin i lo seilen hun.
Tunah thangliana an lunglawm belhchhah zelin.
I lo ni e khuanu zarah an beisei innghahna lungphum.

Dawn ve mah u rualduhte u laikhawpui kan nun.
A hrût vel ruai ruai e ruihna hlo lian lo hrãngin.
Tawktarh chahin vehthlem thin e rawlthar lungmawl.
An intal awk zel e maw ngamthlemna do zo lovin.

Khua a sang ta lua e mutmu tuah zairel nan.
Tho rawh khua i tlai dawn e ka chimlohte.
Harh rawh, karei mut hlen zai rel i tum ta mai em ni?
A chim zo ta maw chun leh zua innghahna lungphum.

Hmanni lawk khan, an tunlai muthlum hri hian kan ute chhungkua tlakbuakin a bawrh ve a. A fa duatlai, tleirawl chhuak hlimhlawt, beiseina leh rinna sang tak nena thlira kehthei dawm tak meuha an dawm, an lo innghah rúk vena ber chuan Respiration D a lo in ve pek a. A chhunmu an kaihthawh zawh loh avangin damdawiin lam an panpui a. A harhchhuah leh beisei taka thlir chunga zan eng emaw zat an tlaivarpui hnuah a muhil hlen ta si a. An rilru a nain an tuar hle mai a. He hrichhia hian chhungkaw dang a bawrh tawh loh nan fimkhur tlang te'ng u.