HMEICHHE VANNEIHNA.

Htluanga Hruaia
HMEICHHE VANNEIHNA.
(Hla fiam a ni a, a dawngtute hi Hmeichhia an ni miau va, mipain ‘A fiam’ kan ti nachungin, thutakah an la leh ngei turah ka ngai...)

Duhsak takin,
Lenmawi kan vuah, sakhming chuai lo,
Vulmawi kan vuah, sakhming ropui;
Hermawi kan vuah, sakhming chuai lo,
Lawhleng sial iang, sakhming ropui.
Hei ang sakhming kan vuah kumhlun!

Kan thlir kân,
Bawhchhetu ransa u hmeichhia;
Derthâwnna fa hrin hmeichhia,
Dâwmkân kher phüt thin hmeichhia;
Nghah chhuah kher ngai hmeichhia,
Vuak leh vau loha lunglian hmeichhia;
Chei loha mawi thei lo chu hmeichhia,
Hei ang nun mak kan thlir kân kumhlun!

Mipa hi zawng,
Mihring kan ni miau va;
Zâwldawh kha kan hringnun,
Ni, ransa chunga thunei tura duan chu!
Mihring kan ni bik miau va,
Duat taka enkawl kan bat a nih hriain;
Lungmâwl chan kan chang, duap der hialin!

Khuareiin, hringnun a her a,
Nunnem sakhmelah chapona pâr a lang ta!
‘Duapzul lungmâwl vâla’ min ti hial mai maw!
‘Mipa kan tluk, kan khüm hial’ an ti mai maw!
‘Mipa kan tluk, an theih ang kan thei’ an ti maw!
Vanneihna fa chuam, hermawi, in dâwn a tawi lua!
Pi pu dâwn rük târ lohin chiang ten a lang leh ta,
‘Hmeichhe finin tuikhur râl a kai lo’ tih ngei chu!

An ropui ta, engkim an thei anih chuan,
Thlàn laiin, miruang zâwnin ‘haw haw’ se;
Tukchawp tingtang kuahin lumen hla hruai se,
Vah loh ram tudaiin, tuikhur râl bâk thlir ve se.

An ropui ta, engkim hi hmeichhe hming vekin,
Mâkpa-zang-kâng sakhming thlâk hial ila;
Aidu-sèn-til tiamin sakhming thlâk law law ila,
Dâwntawi lengi lunglai a dam phawt chuan;
A tul chuan kan awi mai ta lo’ng khiang leh nau...!