Elti Muana
HRINGNUN CHHAWRTHLA
Zantiang lenkawl, thangvan zawl zau a thiang,
Chhawrthla eng mawi lo de, bawh-ar chang iang;
A iang rengin maw hringmi leng kan piang.
Zantlai bawh-ar kai lai a den theih na'n,
A eng zual zel a, a zawh lamtluang a'n;
Hringnun panlai, rawllai kan nun iang hian.
Zantlai arkai a deng, a eng a mawi,
Nung tinrengin an lawm, zaiin an awi;
Hringnun vanglai, vullai sakhmel a chawi.
A lo her zel a, a vanglai a liam,
A eng mawina zawng te pawh kha a kiam;
A iang Khuanu'n hringnun chawhnu a siam.
A hun bi chhiar a kin, hun sul liam vang,
Eng mawi chhuah tur awm tawh loin a mang;
Hringnun pawh a liam, a chang thin tawnmang.
Chung chhawrthlapui chuan hringfa leng zawng tan,
A vanglai, a vullai eng mawi a hlan;
Eng nge kan hlan ve ang zaleng dang tan?
No comments:
Post a Comment