HRINGNUN

Lalzawmsanga Khiangte
HRINGNUN

Kawlkung khumin ni a liam a,
Kumpuisul te pawh an lo vei thin e;
Khawiah nge mual an liam tak a,
Hmanlai te kha khawiah nge an cham le ?

Vangkhaw dai sir a mualah sawn
Piallei dai nghakin ami an zal e;
An hliap e siahthing zar chhawlten,
Zalpuana’n hlophul nem an silh riai e.

Thawhlehna nghakin an zal a,
Tawnmangah chuangin tawpni a awm lo;
Zankhua lo rei kawl a var a,
Chhiara bawar pau te paw’n an thang lo.

Parmawi te an lo vul leh a,
‘Se lungdi tawn lohin an chul zo e;
Virthli leng te an lo thaw a,
A rim te chu an chawi bo ta mai e !

Huntin chhiar chhawrthla a lo kai,
Run In sumtual dawhsangpui a dai e;
Hmangaih lungdi tawna biahzai
Tumthang hruirimawite’n an chawi lo e !

Zantiang chhawrthla a lo eng a,
Thangvan siar zawng pawh an lo kai e;
An hriatpui ve tiamthu zawng kha,
‘Se dai a saw zanmu an tuah ta e !

Kumpuisul lo vei thin te hian
Lenlai ni par te chu a hrutliam a;
Hun leh ni lo thar thin te chuan,
Hre reng loin a mangnghilh zo ta a !

Zawldi thulin hun a leng a,
Chamin lenlai hringnun tang a vuan e;
Vullai parmawi zu a dawn a,
Chham iang hian uaiin a zalh leh thin e.

Sutnghakin fakkuang a nawr a,
Chawma hraitu huntiam a hre si lo;
Lamtluang zal phei saw kan zawh a,
Tehchhuakin a tawp chin kan hre si lo.

Romei karah par an vulin
Sirva leh Lelthang ten zai an rem e;
Zantlaiah chhawrthla lo engin,
Chheri chawmkhuang rem Pawngi lo lam e.

An kianga mi kal ka hmu a,
Mahse hman a mi kha a ni lo e !
Chawileng par rim te a hnim a,
Mahse hman a mi kha a ni lo e !

Rangkham hnui luia’n ruang bualin,
Lentu chawi tlang leh mualte a kan e;
Zuksial tuaithar mamziar iangin,
Lungkham dawn lo rengin ram a chuan e.

Hmangaih lungdi thapar tawngin,
Tukloh lentupui chhawl zar hliapa’n,
Thangvan siar de iarh hnuaia’n
An zal e lunglai hnem par tawn vein.

Chhimthlang kawl thli lo hrang vung e,
Hnah a chhem til a vulmawi par an uai;
Chhumpui kara’n tek lo tla e,
Ri rum rumin a deng thlu lenbuangpui.

Thlang lenkawl kung a saw turni
A eng sen ruai e zamual liam relin,
An khawng ri vung vung darkhuangpui,
Chhawihfa a lo leng e runin velin.

Thiampui-pa’n fenfual dum silhin
Ruang leh nawl mi tam hma a rawn hruai e,
Piallei thuahriatah chuan zalhin
Huntiamah hnemin ‘Mangtha’ an ti e !

Zantlai khawngui hmelhai karah,
Vangkhaw daireha’n an hnutchhiah ta e;
Khuangruah hawktui a lo pung a,
Lamtluang vuta hniakte an ral ta e !

Nghilhlohna’n famrolung an tiang,
Chutah chuan biahthu an thai chiar nghian e;
Kawl eng leh ni tla, sakhming
Lo a dang chhuan tur reng a chuang lo e.

Kumsul veiin chhuanthar lo kai,
A rawng thaithu te rehin an khem e;
Hman a khua mawitu kha a ni,
Mahse thih hnihin hetah a zal e !

Hmanah chuan lenlai par a din,
A ka ata zai rimawi a chhuak ve;
A chawmtu’n vawksa a eiin
Leiah , vaivut chu vaivut a ni e.

Zingah chuan par te an vul a,
Khua a lo tlai erawh chuan an chul thin;
Runin tualmei a lo khu a,
‘Se tlangbawm romei an lo chang zo thin.

Hringnun, hringnunin nghilh mahse
Mangnghilh a ni lawng e chatuan thlengin;
Van boruakah chuan chuangin,
Chhawrthla leh siarte’n an chhinchhiah e.