HLÂN NGAM NGAM ILA ÂW KA TI NGEI

TC Lalremsiama
Telestich:
HLÂN NGAM NGAM ILA ÂW KA TI NGEI

I
Tinkim dâwnin ka zâl e laikhumah
Tuar ka thiam lo ka nunkhua zamual liam,
Hlim nî tawng lo te’n lung lam ka vai a;
Riakmaw kei ka tân duhlêng thiangthing,
Tawng mah ila tuahkhirh kan chang a,
Kei ka chantâwk rêlthang phurh mai lo ni,
Vân ka duai chuang e he lei chinah.

II
Phu loh i zûn zâm hrualhruiin min vêt,
Ka tân tawnthar ainâwn chang mai rawh,
Ka nghilh tâ’ng khâ zawng ka nun kha mî u,
Pâr vulmawi chang mai la ka tâwnah;
A tha lêngdang zawng pawh ka thlîr vêl,
Nang ang chhawrthla no nghial ka tawng lo a,
Chutin zân thim tieng la’ng ka tân.

III
Ka tân chuan i ni e cho loh lawhlêng,
Engtin min ngai ve maw a riang vâla?
Lianchhûng si lo nên biahthu hril a kham,
I lo ni e ka tân lungrûk dî;
Mahse ka phal lo mi tâwna vul,
Bei nge sei Rûn dung ti mai che ila,
Engtin min lo chhâng ve ang che maw âw?

IV
Ka dâwn a tawi nge ka sâm sual vâng zâwk?
Lunglai ka chhîr ngei hmâna ka nun kha,
Ka tawng tlai che’m ni kei ka tân Khua ruat,
Enga’n hmâna’n ka tawn loh che ni?
‘Ti hian vân ruaiin thinlai a zing,
Thlum ber chu ka hlân ngam bawk si lo che;
Duhsâm thâm ral thlâwn i chang mai dâwn em ni?!

Note : “HLÂN NGAM ILA ÂW KA TI NGEI” tih hi Telestich an tih zûlzuia ka phuah a ni a; ‘Chhûra ti ve’ an sawi ang lek phei zawng ka ni nâ’ngin, ka’n hel nuai ve leh tawp mai pek thin chu a nih hi! Hetiang hlaah hian hla tlar tin tâwp hawrrawp mal (letter) hi a indawt dâna remin thu awmze nei emaw, thumal emaw a insiam thin. He hla pawh hi a tlar tâwp zel hawrrawp mal hi han rem khâwm thla ta ila; “Hmangaih thu hlân ngam i la âw ka ti ngei” tih a inrem chhuak ve nîn nian!