CHUAI TA MAW

TC Lalremsiama
Triolet :
CHUAI TA MAW

I
Chul hnu nuihmawi maw tawnmang ianga thâm,
Dâwn chângin zunlêng zâm thar chiai thin e;
Ngaih khua tiseiin thinlaiah a châm,
Chul hnu nuihmawi maw tawnmang ianga thâm.
Mawi chuang sakhmêlah dârtui iang a zâm,
Lung mi runin ka uai nghial thin e;
Chul hnu nuihmawi maw tawnmang ianga thâm,
Dâwn chângin zunlêng zâm thar chiai thin e.

II
Endî chim loh kumtluang tur tiam siin,
Min der maw lêng dang tâwna’n i vul ta;
Lêng dang bêl tâ’ng nang Zotui kiam nîin,
Endî chim loh kumtluang tur tiam siin,
Nghilh loh zunchhâwl min thuai e liam siin.
Mangtha hnuhnung hlânin i chul ta,
Endî chim loh kumtluang tur tiam siin,
Min der maw lêng dang tâwna’n i chul ta.

III
Ka tawng ka ta lo tur che i pam lua,
Chuai ta maw ka tâwna’n nghilh tal chang rawh;
Nghilh har maw her hnu lairil i fan lua,
Ka tawng ka ta lo tur che i pam lua.
Fam si lo liam ta lunglai i fan lua,
I tawnthar tân pârmawi tal chang rawh;
Ka tawng ka ta lo tur che i pam lua,
Chuai ta maw ka tâwna’n nghilh tal chang rawh.

Note : “Chuai ta maw” tih hi French Verse Form “Triolet” an tih zulzuia ka phuah ve a ni a; hetiang hlaah hian hla châng khatah tlar riat awmin, hla chângtin tlar hmasa ber chu tlar li-na leh tlar tâwp ber dawttu atân hmang lehin, a tlar hnihna chu tlar tâwpna berah hman leh a ni a. End Rhyme pawh ‘abaaabab’ a insiam thin nghe nghe bawk. — at Chhûrbûra Aium Institutes.