BEISEI KUMTHAR.

Anirozcp Mawia
BEISEI KUMTHAR.

Kumpui sul vei tumin,
Chung turni a lo nem tan;
Turnihawi chhe par vul chhing chheng,
Laldeng serthlum an lo ti e.

Enteh saw! Zozam par leh derhken chenin,
Chuailo par an vul a karah;
Kawldai par bawm japanhlo a par,
Tlangsam par vul chi chiai saw.

Sirva hram thiam zing ni lum ai in,
Thlasik arpui zu thlum dawnin;
Vahkhuai leh phengpheleng lungrual,
Partin zu dawn za saw.

Rah tlan partin an vul,
Hram thiam va tinrengin zaiin
An awi piallei Ritva, Ramar chen a,
Phuaivawm, Khisa, Hreuthang, Nghovar.

An leng hmun za ram daiah,
Panlai ramtuan thang tin kamin;
Valrual thang per tur kul pum saw,
Lanu leng awh tum reng chu.

Sikpui lo her niin laitha khur e,
Lal piancham lo thlen hian;
Rualduh thenni herpui siin,
Chhungkim dar ang kan len nan.

Ka lenrual duh leng te,
Kar lam hlaah leng turin;
Sikpui khuain rawn her pui e,
Mahte'n lunglen tuar tur renga'n.

Luite ruam tin mual khan thuam,
Hrut velin satin reng chhai i;
Lunglen tawrh dam thei maw aw tiin,
Buannel ram hrut vel ila.

Raltiang romei zam leh khawmei zing,
Tukloh ram dai zokai thlifim;
A lo li liau zo tui thiang,
Lunglen kai tho mai tura'n.

Mahte'n ka tuar thiam lo lunglen hi,
Thaikawi palai bawngte tirin;
Rualduh leng nen lunglen hril dun i,
Kim leh ni sep zain.

A tu leng nge sum tin dawh a,
Lengi bum tura buma awm chu;
Hneh tura hneh a awm chu,
Ka suangtuah fo sikpui khuaah.

Sikni nem khawvawt vin vanglai a,
Lal piancham lawm a thim tham bel a;
Khawvawt pawisa lo lek a saruak a,
Buan ang inpawm te zawng chu.

Chhing dir diar a rum ham hamin,
Rem lal lo piang an lawm a;
Zaikhawm khuang ri rem chauh maiin,
Kawpte'n an su dep dep a.

Van lal nau piang kan lawm hian,
Tapin min thlir hian ka ring thin;
Engtin nun hi thlir ve maw?
Berhbu sarih thlak hian a mawi ngei e.

Kan nun hian a cho chhuak ngei e,
Siamtu thinrim phuba ngei chu;
Zahngai thei Pathian kan neih vangin,
Hun tha min pe a hrailengte.

Aw hringnun bawlhhlawh,
Lunglen hnawt tiau va;
Rualduh ngaihlai khamtu,
Sikni vanglai, i keng tel si.

Rualduh ngaia rum leh turin,
Suangtuah ram bawlhhlawh atang chuan;
Tlang hmun hring cham del chu,
Chuan leh nang e mahriaktein.

An tuanna raltiang ram atang chuan,
Rualduh zaleng dawn ve hian an mawi;
Nau ang kan nuih lai ni leh,
Nau ang kan nawrh lai te zawng kha.

Tunah zaleng zawng chuan,
Lunglen biahthu min ban ka chhiar;
Chhingmit khua a hnim,
Luaithli nul mai ka nuam ngei e.

Tawn leh ni tur thlir a,
Kumpui sul vei nghakin;
Kum leh thar kan tiam ngei chu,
Thleng thuai la aw kumthar duhawm.

Beiseina nen kan thlir che,
Hlimna nen min hmuak la;
Lawmna min pein, hlawhtlinna nen,
Rualduh leng min khawm leh nang che.