A TAK AWM LO NUN SUAK

R Lalchanchin Mawia
A TAK AWM LO NUN SUAK

Zir thiamna tak tak aiin zirsanna.
Hlawhtlinna tak tak aiin hausakna.
Nun tak tak aiin pawnlam mawina.
A phawvuaka phur hluainain min chettirin.
Nun a dazât zo ta maw thangthar bengtlalo hunah.

Khawnge hmangaihna nun mawi chu a awm a.
Tu'n nge huaisen taka dikna laltiang lek ngam a.
Tunge hleih neilo rorelna fawng chelh ngam chu.
An awm ne'maw kristian zaa inchhâl ramah hian.
Khawnge thian chhan thih ngam hnam pasaltha chu.

Dawn ve mah u kan ram leh hnam hmakhaw hun.
I hai ne'm êng hliahtu hun thim pik tak inlar tan hi.
Hnam hmakhawthlir kawngbovin ke pen khalhin.
Penhleh tumkawngah hruaiin kal her liai liai e.
Kan zawh zel e maw ram leh hnam boralna lamtluang.

Kan ram leh hnam dinhmun han thlir hian beiseina tlemte nêna chaurau êk thai mai hi awl zatê a ni ta. Nun tak tak lam aiin a suak, pawnlam landanin lawm a hlawh tawh zawk a. Chuvang chuan, ka chauha ram leh hnam hmangaihtu kan pung ta hluai mai a. Mi rinawm tawpkhawk emaw kan tihte hian rorelna fawng an han chelh meuh chinah chuan, hleihnei lo leh hlemhle nihte mai mai chu mênah an thlak hmiah mai a. Insawi fihlim zo dawna an inhriat phawt chuan pawisak êm ém pawh an nei duh tawh nahek lo. Heti hrim chuan, kan nakin hun zel tur hi ngaihtuah thui ngam chi pawh a ni ta hrim lo ve.