TAHLAI BANGIN KA MAWI SI LO.

R Lalchanchin Mawia
TAHLAI BANGIN KA MAWI SI LO.

Awmhar nichhûn ka chhiar leh thin tinkim dawnin,
A hlui thei si lo thinlai rûkah lungtin ruala lênlaini;
A thar leh thin hmana lung ka rualpui thadãng mi u,
Engah khua tuahrem loh nang kher ka lo tawn che.

Zai vâwr ila, zaitin vâwr ila nêm maw e suihlunglên,
Thu tuah ila thutin tuah ila dam maw e thinlai rùk;
Ar ang vai ruai ruai e hnémtu tawng lo nun khawhar,
Vaihkhua seina tur rènga'n a thar leh thin thinlaiah.

Hawi ruai ruai mah i ka tawng ne'maw a sakhmel mawi,
Vàn ruai ruai mah i hnêmtu awm ne'maw a riang thinlai;
Lunglam ka vai ruai e khuatin chuana hawi velin,
Thinlai zochhum ang a zing riai e luah loh zûnlêng ngaiin.

Thinlung beiseina insiam chawpa zawng ruai ruai thinin,
Laitual fangin ka hrût vêl ruai ruai thin e kiltin kiltang;
Zawtin ka zawng ruai ruai a mi zaleng rualduh zingah,
Khualian vêlchhuak mah i tawnni awm si lo he leichinah.

A riangval lunglai hnêm maw e zai vâwra thutin tuahin
Ka hawi vêla khua romei zâm leh lelthang zaivâwr;
Zùntin bânin min lên zual e ka awmhar suihlung,
Zûn ngaih bángin ka mawi love khuarei kumsul vei paw'n.

Thu leh hla lama tui ve tak ka thian pakhatin a taka a tawnram nun behchhana chhamhla phuah turin min cho phawk pek a. Chutia, ani meuhin min phût fiam takah chuan, kei lah pek chuan, inthlahrun nachang hre hauh lovin ka'n phuah nghal ngawt mai a.

Hetia thuhnu dâwn lêk lova ka'n ar mit tet khuan tâk vak siah chuan inhmakhawsuih nan dai ka theu a tul ta tlat mai le. Chhungte leh thenrual thaten ninawm khawpa min tur hnua nei ve chauh ta nafam chuan nunhlui sawi tûr eng emaw te chu ka nei ve nameuh ngei ang le..!? Amaherawhchu, Aigupta milim ang tlut nghet ka thinlung hi kan nu-ah insawrbingin a inphun nghet tlut mai a. changdang kàn a tum lovin a thei hek lo. Nunhlui chu nunhluiin mual liampui tawhin min tibuai pha eih tawh lo a ni tih hi ka mipa nihna chhâlin ka puang e.