SEMZAITHIAMI

Elti Muana
SEMZAITHIAMI

A sakhmelah rangka-dartui a luang em ni?
A kimtlang a mawi, khuavang note em lo ni?
A chhingmit a mawi, a ngaihmelh do zo awm maw?
A hawi a her tinin valate lung a lem.

Leng dang chhin zawh loh sakhmeltha semzaithiami'n,
Valate hnar phal loh hmangaihna phalrai e;
Chhuihthangvalate'n a tangnem belh zai an rel,
Rose par kungin hling a nei tih an dawn si lo.

A sakhmel hehah vahkhuai zu a luang em ni?
Chhuihthangval rualte'n an fawp bang thei mawlh lo e;
A par zu tlan zingah hai lo reng an awm lo e,
Hei ngei hi lo ni e, an piallei chatuan chu.

Ka thian, nang chuan hnar zel ang che -
A hmangaih ngaihmelh hmel duhawm;
Val zawng lawi na'n khartung a hawng,
An siang lawi hnu chhuihthangval tan
Leng-hawn-ar a khuang ngai nem le.

3rd Oct. - 17th Dec. 2004