NUNPHUNG A KHAIHLAK

TC Lalrem Siama
Verse Libre :
NUNPHUNG A KHAIHLAK

I
Ka tuna chin tanbun hmawk bul lamin min delh bet,
Sek phek ve lo daw-rawm sa hi ka awngrawp zo,
Ngui leh nguaina thlarau sawngnawiin min man;
Hringnun min phuar hnawktu lapaw hrui hi,
Ka phelh thei tawh bik lo, ka tang laklawh tlat.

II
A ni, mutmu lah tuah alh zo ve hek suh i,
Mamitchhing chungin ka meng reng lawi a;
Zal ve e ti lo chuan mut zai ka rel thei na hek lo,
Mit var fu si mut hmuh tih awm hek suh,
Ni, zan khawtairekah pawh hian mawle!

III
Ngaiteh, zan aw mawi pawh a lo rik leh tak chu,
Zan tlai nem nungcha tinreng an chiar nghian,
Zantiang Zo-chhemdamthli paw’n
Thingtin nem hnah a chhem seng seng;
Hram thiam U-ngau lo kuk leh,
Zai vawr Zo-bawar khuang zawng hian,
Kei ka lungmawl dawntawi a tisei fo thin.

IV
Chutin chung si-ar leh chhawrthla eng,
Tlang leh mual cham dum pawl ruai,
Ram dai lentu thingtin a hnim chuai nen,
Zan Zo-daifim chawm zik-thing hnah no hlim hliam
Thlirin a khi a khu leh saw ral ka hawi vel thul a;
Rauthla emaw ka tawnmang si lo chu,
Milton leh John Keats sakhmel rawn inlar e!

IV
Mahse khua duan mawina hian hling a pai an ti,
Mawi chuang lunglai kuai hian lairil a chhun vawng vawng,
Kha zawng hliam hnu pawh a tithar ting a ni lekfang si.
Khuarel mawina ngat te zawng thlakhlelhtlak a nih vei nen,
Kei ka tan erawh doral khirh herh a chang zo bik thin em lo ni le?

V
Ni lo;
NUNPHUNG A KHAIHLAK!