Ṭahlai bang rawh

Ṭahlai bang rawh

Mafaa Hauhnar

Mittui hril phâk loh nâ i tuar bik maw?

Nui ri lan theih hlimna i hmaa saw!
Harsatna-in hlimthla iang a zui che’m ni?

Lawm rawh, vanduaina chu finna a ni,
Tuartu tawrhna chuan chhelna a siam si,
Engah lunglai chhir rêng rêng a i awm?

Meipuiah paih la, i lungngaih no dawm,
Mittuiin hnung a la chhawn dawn che alawm,
Hniak sang tamin he ruam hi an lo zawh;

Phurrit tak phurin an lo paltlang tawh,
I mal lo ve, nang paw’n tuar fan fan rawh;
Kal lai rel la beiseina ban vuanin.

Hmâna ‘tûn’ kha ‘khuarei’ an chang angin,
I ṭahna pawh ‘hmân’ a chang dawn asin;
Chhingmit hawngin han hawichhuak teh, ka \hian.

Zaia he thu ka hril mek lai pawh hian,
Hlim kâwl a lo êng, chhaktiangah khian;
Hmuin han hrethiam tehrêng la aw!

(Mizo poetry a ka chhiar ngun ber pawl a nia, ka rawn share ve che u.)