RAIRAH RIANG.

Rukia Spi

RAIRAH RIANG.
(post hlui a ni tawh na a, ka rawn thar thawh leh mai mai)

Tuiril mai ka nih lai ata tawh,
Ka chunnu leh zuapa lu ka tihai lua,

Khawvel eng hmu ve ngai lo turin,
Ka zuapa'n a neih sum a phal tam ngei,
A thiam tawkin anka a hlan ka chunnu.

Chunnu lairil a na vawng vawng,
Chhunni leh zan hlim lai reng nei love,
A zuam mawlh lo, a cho lul lo.
Kei ariang puan ang hnawl chu,
Chhingmittui a sur bang lo, chunnu biangah.

Ka zuapa'n derna ankain lem mah se,
Damchhung hrehawm tur phur zo lovin,
Anka lo hnawl hram e, ka chunnu'n.
"A zahawm a lawm le chung Pathian" tiin,
Muala'n a liam ta e, ka zuapa.

Hmangaihna tel lo, nawmchenna vanga,
Lo awm ve kei ariang vang chuan,
Ka chunnu'n phur zel e, selna anka zawng.
A nat teh lul nen, zuapa hmangaihna,
A tam lua,tlangrel meuh han phurh chu. 

Chunnu lungtingai zual tur hian;
Mim ang ka lo piang ve ta chêng a,
Ka chunnu chhingmita thlaphang hmél kha.
Lo hmuthiamin hrethiam ila zawng,
Ka hmu ngam hlei long e, khawvel eng hi.

Khuanu zarah damte'n ka lo seilian ve a,
Chunnu'n mi chawilian dawn emaw ka tih laiin,
Lengdang a chhai, ka chunliani'n.
Kum tam pawh vei lovin mi thai a chang ta si maw?
Zuapa'n 'ka hrai' tih reng mi tum si lo.

Thing delh lo, lung delh lo chu lo seilian zelin,
Zirna rûnpui ka lo bel ve a,
Duh a tam, mamawh a pung tual tual,
Tu bulah nge maw ka thlen ve tak ang le?
Ka chunnu leh zuapa ko phak si lo e.

Riahrun vai bik mah suh ila,
Khawi hi nge ka run nuam ve chu?
Laikhum belin ka tap, banzai ka rel thei lo.
Ka dem leh thin, ka chun leh zua kha,
Tapa rumin tlaikhua ka var leh thin.

Hawi velin laitual han leng ve mah ila,
Ka hai bil lo, sitna mitmeng chu,
A vang lua ariang tan, then leh rual tha.
Tapin run in hliapa'n tlan thin mah ila,
An awm ve si lo,hmangaiha min lo pawmtu.

Chun leh zua ten mi chawi lian lo mah se,
Kei mi lo chawiliantu chung Pathian.
Kei ariang hi tapa rum chang ni tam mah se,
Ka tan ka chunnu leh zuapa chu,
Chung Pathian engkim ruattu chu lo ni e.