ZO VE REI REI THIN TAK KA NI!

ZO VE REI REI THIN TAK KA NI!
                                    By TC Lalremsiama
Lung a'n lên tak tak hi chuan, hlâ te pawh hi 'Zo raih' mai lo hi chuan ka kawchhûng a fan pha ve ngâi lo a; khawsak phungah mai pawh ni lo, lunglên thû hlâah pawh hian ZO VE REI REI THIN TAK KA NI! An tûnlâi thu phuah, a thlûk siama rimawi nên rema an âu tiâlpui rai rai ang te hi chuan kei ka zak hi a dêk za pha ve ngâi hauh pek thin lo! Keimâ thiam loh vek a ni mah nâ!

Khaw nge, zânin pawh hi Lênlâi Zâi leh Thailungi Zâi kaihkawp ngat hian kan inâwi mu leh dâwn teh ang khai! 'Ti hian...

RÛNREMMAWII

I
Khâ zawng dî vâi khan,
Lungrûk duhsâm kim ka tawng ta che;
Khâ zawng dî vâi kha.

Lêng dâwntuai tîr Sakhmêltha,
Ka tân kumtluang tur chang rawh;
Ka tân kumtluang tur chang rawh.

II
Lung tiâwi Nuimâwi,
I zûn lêng zâm zâwlaidî ka kâi;
Lung tiâwi Nuimâwi.

Virthlî nge maw i zûn lêng?
Ka thinlâi a chhêm seng seng;
Ka thinlâi a chhêm seng seng.

III
Awmhar ka âwi e,
Hrailêng lo nang ngaih awih a har;
Awmhar ka âwi e.

Sên lâi iâng min awm ve rawh,
Tichuan ka dam ngêi ngêi ang;
Tichuan ka dam ngêi ngêi ang.

IV
Ka tâ tur i tiam,
Thinlai tirun thlâwna’n chang lo la;
Ka tâ tur i tiam.

Thu dî lêm ang min der chuan,
Ram loh chhâwl ang ka uâi ang;
Ram loh chhâwl ang ka uâi ang.

V
Ka lung tum i ni,
Nang lo chu tleipui dang ka nei lo;
Ka lung tum i ni.

Phengphelêng kawp lâi iângin,
Dî-tian ka rêlsan lo’ng che;
Dî-tian ka rêlsan lo’ng che.

VI
Kan rûn lo kâi la,
Ka ti ngêi ang che RÛNREMMAWII
Kan rûn lo kâi la.

‘Ti hian hlim tâwp hlau loin,
Hlui dun i rêl dûn ang aw?
Hlui dun i rêl dûn ang aw?

- tclrs 2000