Wednesday, 19 September 2012

TAWN THAR ‘D’

TAWN THAR ‘D’ By Saitea Fanai

Dai ngai loh thiamna runin belin,
Kan kai e zaleng nau a lian a te;
Chutin ka lo tawng che, khuavang lasi;
Tihian ka dawn che am ka thai changa’n,
Biahthu ka hlan ta che min chhan ve nan,
Rualtha thu mai zawng ka awih ngam si lo;
Nang ngei min hlan la min duhthu,
Vanhnuai hringfa hlim ber ka lo nih theih nan.

Thil engkim hi i hriat ve ka duh tlat;
Hmachhuan tur ka neilo ka tih tawh kha,
Rosum zawnga min teh i tum tlat chuan,
Ka tling ngailo ang keizawng ka hniam hrat;
Mahse heti bakberh chung chung pawh hian,
I rin ai chuan ka hmangaih phian ang che.

Note: Hla ani nachungin sakloh chi, (Sonnet) huanga mi a ni a. Alo chhuahna chiah hi hriatchian a har a. Italian Sonnet” dungzuia phuah a ni. Kum zabi 13-na hunlai vela Italy rama an chhin chhuah a ni a, kutziak lehkhabua kan hmuh angin a zai kungpui Petrarcha’n tuna anihphung ang tura alo chulmam hi a ni.

Tlar 14 a sei, tlar khat a thulam 10 zel awm, ABBA,CDE-a rhyme a ni. A hlawm hmasa tlar 8 hi Octave(Octet) an ti a, a thlur 2-na tlar 6 hi Sestet anti ve thung a ni. Octave-a kan thupui kheuh hawn hi Sestet-ah hian a vawrtawp thlenpui a ni. Kan hmangaih kan tawng hi (ti ve khanglang ila) “ Stress leh Stress” lova innghat lova, tonal languages a nih zawk avangin he hla hi “ Metrical verse” ni lovin “ Syllabic verse” a ni e. Chhiartu ten in hriatthiam ka van duh tak em!!!!


No comments:

Post a Comment