LIANDOVA LEH TUAISIALA

Tlangvaltea Arema

Ka han tarlang ve ange, a duh chuan min chip thei ang. A sei viau mai a ka inthlahrung khawp mai.......

LIANDOVA LEH TUAISIALA

1. Liando, Tuaisial rairah riang nun kha e,
Tun hailo Zofa leng zingah;
Dawnlai reng bang lawng e nun hlui chhuiin,
Nghilhni reng awm lo, puan ang chul lawng.

2. Laitual an leng hlimzai an vawr siau e,
Mahse hringmi nun ram chhim chu;
Tawng lo tur reng awm lo lungngaih tahna,
Zuapa chhingmit a thim hnai e.

3. A dawn lo em ni le hrai leng chan tur,
Fahrah nundan dawn billo nge?
Liam zai a rel dawn le Rihsangmualah,
Hrai chawi an riang sei awm mang e.

4. Zuapa fam khua bela liam tur chu e,
Hrai leng leh thai riang ten an thlir;
Lungmawl Tuaia'n ngaithiam thei mawlh love,
'Sepui thi tur iang e' tiin.

5. Pa lo naufa chan tur reng chu dawn la,
Engtin hmang maw hmatiang hun tur;
Nang lovin ka zo lawng e Liando pa,
Lung ka mawl lua nuthai leng hi.

6. A liam ta e, Liando pa a liam ta,
"Lungphang lo la chawilai karah,
Tulpui nang e sial ang seilen thlengin,"
Tiin chunnu'n tahzai sa e.

7. Khua lo rei chhunnun a dawn sual em ni?
A sut mai le tulpui thu zawng;
Fam lovin mual liam e khiang awih relin,
A pawi em e, Thangsei tawnah.

8. Thing delh loh lung delh loh ve nafam chu,
Hai ang thangin sial ang lian zel;
An nun ze mawi Hmangaih luangliam ngei chu,
Par ang vultir unau karah.

9. Tu hraichawi lengin chhingzo awm lawng e,
Hmangaih unau nundan mawi kha;
Pumbilh mai lo mim fang mahni maiin,
A hlu lua e duhsak thinlung.

10. Mahse laitual an leng nuamlo unau,
Rual zawng sit leh engdawng nih chu;
Lai ana ngei chun leh zua awmlo chu,
A hma lua em zuapa fam kha.

11. Laitual fang e ziathup nundan phung nen,
Tun uksak love Lal Lersia;
Liando michhe unauin sawm ve e,
Tap tuallum bel ve tur tal a'n.

12. A chiang ta em mi chhe daikil bel nun,
Siam nang tiin Lersia'n fahrah;
A thlantir e sepui chi tha hmingthang,
An tlai ngei e Lersia tawnah.

13. Kianzai rel zel fam ngaih zunleng zamin,
Chunnu lungmawl ngaihlai bang e;
Khuanu'n vur zai rel zel maltin sawmin,
An phu hliah hliah hawihhawm nun nei.

14. A ri bung bung darbu Liando runah,
A mi leng ten bengtin chhiin;
'Liando unau dar ze nge in tum le?'
A mawi ngai darbu kim ri chu.

15. Tlawmnun nei chapo kiansan chuanin e,
Darbu awzawng tumlo em ni?
An khai nel nel tap tuala'n bur chhe te,
A mawi mawh awm a ri tur chu.

16. Ruk ten kam tha fah e pi fel Fangi'n,
Lenmawi Tuaichawng rengpui fa chuam;
Sih huai kiu thin sih zawl a thang mawilo,
Liando sial kiu thin lo ni e.

17. Khua zawng laia darbu tum ri mawi ber,
Thang rehlo Liando run riangah;
Hlan zel e Tuaichawng tawnah pi feli'n,
Sawm ta e Liando thai tura'n.

18. Tuaichawng kawpchawi thlan ni chuan val tin te,
An kim ngei e Liando tih loh;
Thlanzai rello kirtiang rel e Chawngpuiin,
Mi kim sa kim hma loh chuan maw.!!

19. Lawm a kimlo Laldang tawnah Liando,
A thlang si maw Chawngpui sialin;
Mi tha naufa kha zawng zingah khan maw,
Fahrah bal khawn liak kher kher chu.

20. Lunglawm kim lul lo khua leh tui zawng te,
Khawiah Tuaichawng man tur kawl suh;
Se huang tawndarh, tungchaw uai tliak khawp thi,
A ngiat si lunglian Tuaichawnpa'n.

21. Singai sumtin phur rulpui chhunrawl kha,
Liando te unau malsawmna;
Lal tha Lersia kumchhir sial thlah nen,
A tawk fang ngei Tuaichawng tawnah.

22. Se rual, thi nen Chawnghniang man tlak ni chuan,
Ri bung bungin an lawm tualah;
Ngurpui lunglawm kim, tual mei khu lu lu,
An vawr siau e pheilai khaiin.