DAWHSAN.

Ka lunglen ve na lam thianpa Vanlal Hminga'n a kai chhuak tlat....

DAWHSAN.  By Lch Rokhum
13/4/02
Khua chawite u lo ngai teh u,

Thiam channa tlang kan ngaihsan hi;
A van silhpuan ka phelh dawn e,
Hmanlai tawha kan chawisan hian;
Ril a rah pawh zilh ngam lovin,
Nang leh kei maw min khalh tak le;
Ka ngai thiam lo ka hlip tang e.

Zaleng tawna tlang thianghlim ber,
Zofa chauh lo khawvel zawng nen;
Hrui khat vuana kan chawi rawn hian,
Tunah Kulva laldang iangin;
Khawtlang chauh lo kohhran thlengin,
Silhpuan tialin a tuam tak hi;
Itsik verther rilru nenin.

Ka phal thei lo tlang mawi ber hi,
Elrelna ban phar vel nan chuan;
Ka phal mawlh lo he dawhsan hi,
Hmana mihrang tlawmngaihnain;
Duhte’n a din a lo nisi,
A ni mawlh lo sawtiang tan a;
Hliahkhuhna bang a chang mai hi.

Tunah tlang mawi kan kunna chu,
Thlengthlawrzuan hmang nihna chauh duh;
Hamthatna chauh zawng thintu ten,
An chen vel e khawikipah pawh;
Dawhsan puanvar tiahtang vuanin,
In lukhupin a awng bihin;
An thlir ber pawh King-awr-sen-a.

Chhung kual loh tan van a duai chuang,
Hetiang renga hrual vel nih chu;
Lenkawl mawitu a awm love,
Chhaka lo chhuak thlang liam chhun pawh;
Bianga luangchhuak vang chauh a ni,
Sam ve chang chuan kan chanpual hi;
Thisen hialin ka thleng nuam e.