Chhawkhleipar Zarpuii
SAWI FIAHNA:
JF Laldailova, Junior (U Makima) lehkhabu chhuah "Lurhpui Dingdi"-ah
khan hei hi Pu JF-a kutchhuak zingah a telh a. 2008-a ka lehkhabu-a ka chhuah
dan ngai ngaiin ka'n tarlang leh ang e.
Chhawkhleipar Zarpuii
Lêna chhawkhlei leh Lurhpui dingdi,
Chhimhlei pial mawitu, hawihtea par vul kha,
A chuai, an ti, a iang lêng zawng nen.
Nang zawng, Zarpui, i chuai dawn lo;
Lên chhawkhlei leh Lurh dingdi chu iang mah la,
Chul mai atan ka phal lul lo che.
Tawnmang tiriang, ka chim loh par,
Chung chhawrthlapui dêt leh mang tâwp thleng pawhin,
I hlui chatuan lo’ng e thinlaiah.
Thliah loh te’n i vul mawi thlawn ang maw,
Dawn lohvin, aw, i pâr zû a kai thlum thra!
Vul lai i zual mah ni si hlei lo.
Maurua iang dâwntuai leh ka nuam e,
Lênlai chul hnu kawp te’n kan din thar tura.
Di tuah a rem lo - a pawi ber mai.
I sakhmel sen sir siar dâwn changin,
Lei hmun khawhar a vul thin e, ka tawnah;
Ka lung dam nan rêng vul zel rawh maw?
Note:
JF Laldailova’na Churachanpur lama a lungdi Ethel L.Zari lehkha tur, kum
1973/1974 Krismas dawn hnaiha pen-tui perh nian nuana a ziah, chhiar har zet
mai, hêk hiam huam tawh, amah Pu JF-a ngei pawhina, “... kim lo leh chhumbung
rim rem, hieroglyph ang maia decode ngai lek lek, hawrawp duhdah tak maia ka
scribble mai mai,” a tih original ka chhiar a.
Chu lehkhaa: “Mahse, nang zawng, my Z, ka thinlungah i chuai chatuan dawn si
lo!
Kan lênlai tawnmang a chang zo ta,
Lênah chhawkhlei a par e, Lurhpui dingdi,
Chumi iang leng zawng chu kan chuai.
Mahse, nang zawng, Zari, Lêna chhawkhlei leh Lurha dingdi chu iang mah la, i
chul ka phal loh tlat avangin i chul chuang dawn lo,” a tih lai ka chhiar chuan
ka ngêngpui a chhun ngaih mai a, Pu JF-a pual liau liauvin Mizo tlar thum zai
(traditional verse form)-in he hla hi ka phuah ta chûk chûk a. Sabereka
Khuangkaih Sept.1997-ah khan Pu JF-a hmingin ka chhuah ve ta thâwr a. Khatia Pu
JF-a hming hmanga ka chhuah thlâk rîk rawk nachhan kha mi thenkhatina sum leh
pai siam nana hlâwkna mitsir râna “literary forgery” an tih thin ang beisei
vang hi a ni hauh law. Ka phuah chhan (‘idea’ min petu) kha amah Pu JF-a thu
leh hla ngei a nih avangin amah chawimawina a nih beiseia ti ta mai ka ni zawk
a, sum lamah phei chuan ‘naia sen’ (one red cent) pawh ka hmuh phah hranpa lo.
Mahse ka han ngaihtuah ka han ngaihtuah hnu hian kha ka thiltih khan that lohna
nei thei dawna ka hriat leh tâk avangin a phuahtu dik tak zawk ka nihna ka han
tlangzarh ta mai a nih hi. My apologies!
He “Chhawkhleipâr Zârpuii” poem i chhiar hma hian Awithangpa hla châng, “Kan
lênlai tawnmang a chang zo ta” tih kha han chhiar hmasa zauh la a chhiar a kal
zaih mai ang.
No comments:
Post a Comment