KA NGHAKHLEL EM E, DAR ANG TAWN LEH HUN

KA NGHAKHLEL EM E, DAR ANG TAWN LEH HUN

By PC-a Lalnghinglova North East

             

1.      Di  ngai  rengin  chhawl  ang  ka  uaihniang  e,

A  riang  awmkhawhar  hnemtu  awm  si  lo.

Karah  zamualpui  lamtluang  a  sei  ngei.

Sirva  te  a  riang  minhnem  thei  lo`m  ni ?

2     Ka  nuam  e  sirva  leng  iang  thla  zarin,

Va  chuan  ila  lungduh  lenna  tlangpui.

Chutin  suihlunglen  zamualpui  liamin,

Ka  tawng  ngei  ang  ka  thai Di Bawihmami.

 3.  Hmanah  Tualvung  kohthiam, Huiva  leng  kha;

Rawn  leng  ve  la  a  riang  ka  tawnah  hian.

Va  kal  ta  la  ka  thai  Lungrun  tawnah;

'A  riang  hluan  e, I  di'';  va  ti  nang  che.

 4.  Chungtur  ni  khi  zamual  reng  liam  si  lo.

Awi,  khua  reng  sei  dawn  e  ka  thai  tawn  nan.

Zaleng  dang  chu  nui  hiau  ve  di  kiangah,

I  rauthla  tal  rawn  tir  la  lunglawm  nan.

5. Zaleng  par  zawng  zinga  mawi  hluan, ka  thai.

Ka  lawmna  kim  rohlu  chu  nangber  hi.

Damte`n  lengin  hlim  zai  vawr  zel  ila,

Ka  hlan  zel  nang  che,  kumtluang  hmangaihna

6.  Chhingmitah  a  cham  reng  ka  thai  hmeltha.

A  tello  awmhar  lung  a  leng  mangnge.

Chungtur  nipui  zamual  liam  thuai  se  aw;

Ka  nghakhlel  em  e,  dar  ang  tawn  leh  hun.

7. Khua  hmunloh  a  leng  di  leng  zawngte  hian,

Engtin  tuar  ve  che  u  maw  hlimna  par;

Di  zunleng  ngaih  thlafam  ngai  iang  tah  hi ?

Tuar  thiam  bik  reng  hianin  in  mawi  lo`ng  nge.

8. Minsel  lul  su  aw  lenrual  zawng  te  u,

Khua  hmun  loh  di  ngai  renga  ka  tah  hi.

Thlafam  zunleng  ngaih  reng  a  iang  chuang  e,

Suihlungleng  kei  ariang  tawnah  hi  zawng.

9. Sakhmel  mawi  tawnga  buanang  pawm  lehin,

A  mi  iang  khuahmun  hlimlai  chen  ve  in,

A  thiangte`n  par  ang  kan  vul  ve  tur  chu;

Ka  nghakhlel  em  e,  dar  ang  tawn  leh  hun

10. Aw  ka  di,  a  riangte`n  i  leng  tur  hi.

      Ka  dawn  hian  thinlai  a  dim,  engvang  nge

      Kar  hla  kamdin  nunkhua  ka  lo  zawh  le ?

      Mahse,  Chung  Pathian  ruat  a  lo  ni  si.

 11.    Zamual  danah  pawh  hlimte`n  leng  ila,

          Chung  Khuanu  ruatsa  ah  lawm  zel  tumin;

          Vawng  zel  ila  kan  kar  duhawmna  tin.

          Van  Pathian  malsawmna  kan  chang  ngei  ang.

                                          Phuah  ni :- 16—Sept—2004  (0915 Hour)

                                          Phuahna hmun :-Jaisalmer  (Rajasthan)