TUM LOH LENG VAU LAWKNA

Hruaia Hualngo

TUM LOH LENG VAU LAWKNA
(SO SAD! SHE SAID SO!)

Mi hmuhin mi hmangaih lo turin inveng la,
Ka zuna uai lo turin fimkhur ang che!
Ka sakhmel mawina hian zem lo che se la,
I duhaisamin ka kimtlang zui hek suh se;
Ka bahsam leh baksam hian hip lo che se la,
Ka phei chheh hawiin i mit len ruai suh ang che;
Ka mit zai khata buai sanghlei leng zingah tel suh la,
Ka heh vam hiam hian kang che suh se;
Ka anka ngaihnobeina hian phuar lo che se la,
Ka nui hmel hian i thinlunga duhna inmun chu kaitho lul suh se.

Heng zawng zawng hi,
Keimah leh ka thinlung chawp hian,
Mi pakhat ta a ni tawh a;
Ka nui hmel bik phei hi chu,
Amah vang chauhva ama tan chauhva pu ka ni!

'Beidawng' tih thumal hi la hmelhriat ngai lo pawh ni la,
Keima chungchangah bik hi chuan-
I thufiah bu-a telh hreh suh ang che.
Kei hi mi dang ni lova keimah ngei ka ni angin,
Tu dang ta mah ni lovin, mi pakhat ta chauh ka ni.

Ka thlan loh chuan mi thlah tawh la,
Ka zai loh chuan mi zui tawh suh!

Duhsak taka thu ka rawn lai che hian,
Ka zunfei hriamin a hliam hma ngei che hian,
Ka thu chu ngai la,
Mi kiansan mai rawh.
Hriam lova ka hliam hlauh che zawngin,
I dam chhungin dam ni hmel i hmu tawh dawn si lo!